Toyota kompaniýasy täze bz Woodland elektrik krossowerini anons etdi. Model syýahatçylara niýetlenip, doly herekete getiriji, umumy kuwwaty 375 at güýji bolan iki elektrik hereketlendirijisi we ýolsuz ýerden hereket etmek üçin X-Mode ulgamy bilen enjamlaşdyryldy.
Klirens – 210 mm. Bagaž ýeriniň göwrümi – 850 litr. Iň ýokary tirkeg agramy – 1587 kg. Goşmaça tölege bu model üçin agyr ýollara niýetlenen tekerler hem hödürlener.
Salonda öňdäki oturgyçlar gyzdyrmaly bolup, SofTex materialyndan taýýarlandy. Şeýle-de, iki simsiz zarýad beriji we alty dinamikaly audioulgam bar. Premium bukjada dokuz dinamikaly JBL audioulgamy, panorama üçegi, oturgyç wentilýasiýasy we infragyzyl gyzdyryjylar hödürlenýär.
Howpsuzlyk ulgamlarynyň arasynda Toyota Safety Sense 3.0 bar. Oňa adaptiw kruiz dolandyryş, zolakda saklamak we zolakdan çykylandygy barada duýduryş, pyýadalary tanamak bilen çaknyşmalaryň öňüni alyş ulgamy we faralaryň çyrasynyň awtomatik üýtgedilmegi girýär.
Krossower 150 kWt çenli kuwwatly zarýad berşi goldaýar. 10-dan 80%-e çenli zarýad 30 minut töweregi wagt alýar. Ulagyň bir zarýadda geçýän menzili 420 km barabar. Grip Control ýoluň kyn ýerlerinde durnuklylygy saklamaga kömek edýär.
Model 2026-njy ýylda ABŞ-da satuwa çykar. Bahalar heniz yglan edilmedi.
