Dünýäde elektromobil satuwy 2025-nji ýylyň ilkinji dört aýynda 5,6 mln ulaga ýetdi we bu 2024-nji ýylyň degişli döwri bilen deňeşdirilende, 29% köpdür. Diňe aprel aýynda 1,5 mln elektrokar satyldy diýip, Rho Motion habar berýär.
Hytaýyň paýyna 3,3 mln awtomobil (+35%), Ýewropa – 1,2 mln (+25%), Demirgazyk Amerika – 0,6 mln (+5%), galan sebitlere – 0,5 mln (+37%) awtomobil düşdi.
EV Volume-yň maglumatlaryna görä, 2021-nji ýyldan 2024-nji ýyl aralygynda elektromobil bazary tas üç esse – 6,5 mln ulagdan 17,3 mln ulaga çenli ösdi. Statistikada hem arassa elektrik ulaglar, hem zarýad berilýän gibridler göz öňünde tutulýar.
Hytaý dünýä bazarynyň, takmynan, üçden iki bölegini eýeläp, satuwda we önümçilikde öňdebaryjylygy saklaýar. Ýewropa ikinji orunda durýar. Olar bilelikde global satuwyň, takmynan, 85%-ini emele getirýär. Galan paý ABŞ bilen beýleki sebitleriň arasynda paýlanýar.
Birnäçe uly awtomobil bazary okgunly tizlik bilen ösmegini dowam etdirýär. Hususan-da, 2025-nji ýylyň başyndan bäri şeýle ýokary depgin Germaniýada (+42%), Italiýada (+56%), Ispaniýada (+57%) we Beýik Britaniýada (+32%) hasaba alyndy. Fransiýada sarp edijiler üçin höweslendirmeleriň azalmagy sebäpli, tersine, pese gaçyş (-14%) bellendi.
Şu ýyl Demirgazyk Amerika bazary 5% ýokarlandy, esasan, Meksika hytaý importynyň ýokarlanmagy netijesinde çalt ösüşi görkezdi. ABŞ-nyň, Beýik Britaniýanyň we Hytaýyň arasyndaky söwda ylalaşyklary wagtlaýynça nyrhlary gowşatdy, ýöne elektromobiller we ätiýaçlyk şaýlary üçin paçlar dowam edýär.
Elektromobillere geçmekde öňdebaryjylar Skandinawiýa ýurtlary, ilkinji nobatda, Norwegiýadyr. Ýerli hökümet 2025-nji ýylda benzin we dizel ulaglarynyň satuwyny gadagan etmegi meýilleşdiripdi, ýöne bu zerur bolmady: 2024-nji ýylyň jemi boýunça ýerli awtomobil bazarynda elektromobilleriň we zarýad berilýän gibridleriň paýy 90%-e golaýlady, 2025-nji ýylyň aprel aýyna çenli bolsa eýýäm 97%-den gowrak boldy.
