TikTok sosial ulgamynda emeli aňyň esasynda täze TikTok AI Alive guraly peýda boldy. Ol adaty suratlary owadan effektler bilen gysga hereketli wideolara öwürmäge mümkinçilik berýär. Bu funksiýa eýýäm Stories bölüminde elýeterli bolup, platformanyň ulanyjylaryna öz döredijiligini görkezmek üçin täze mümkinçilikleri berýär.
Täze guralyň kömegi bilen ulanyjylar surata hereket, ses we dürli effektleri goşup, ony janlandyryp bilýär. Mysal üçin, ummanyň peýzažynyň suraty bulutlaryň asmanda ýüzýändigini, tolkunlaryň kenara çapýandygyny, Günüň batyşynyň bolsa kem-kemden asmanyň reňkini üýtgedýändigini görkezýän wideo öwrülip biler. TechCrunch köpçülikleýin selfiniň hem “janlandyrylyp” biljekdigini belleýär, şeýle ýagdaýda emeli aň suratdaky adamlaryň duýgularyny we ýüz keşbini görkezer.
Häzirlikçe funksiýa diňe Story Camera arkaly elýeterli – ulanyjy Stories albomyndan gerek suraty alyp, şondan soň redaktirleme ekranyndaky ýörite nyşanjygyň kömegi bilen AI Alive funksiýasyny işjeňleşdirip biler.
Bu guralyň kömegi bilen döredilen ähli wideolarda onuň EA tarapyndan döredilendigini görkezýän bellik bolar. Wideo ýerleşdirilmezden ozal birnäçe barlag tapgyryndan geçer: ulanyjy tarapyndan ýüklenen surat, tekst we ahyrky netije seljeriler.
Şeýle-de, ulanyjylar sosial ulgamyň düzgünlerini bozýan wideolar barada habar berip biler.
Bellenilişi ýaly, bu platformanyň suratlaryň esasynda kontent döretmek boýunça ilkinji tejribesidir, ozal diňe tekstiň esasynda döretmek mümkindi. Şeýle funksiýalar Instagram-da we Snapchat-da bar bolsa-da, hut TikTok ilkinji bolup suratlardan wideo döretmegiň doly derejeli guralyny hödürledi.
