Apple-iň 2027-nji ýyl üçin uly meýilnamalary bar, kompaniýa düýpgöter täze önümleri çykarmagy meýilleşdirýär, olar eplenýän iPhone, Apple Glass akylly äýnegi we öý roboty.
Bloomberg-den Mark Gurmana salgylanýan Appleinsider-iň habar bermegine görä, esasy täze önüm köpden bäri garaşylýan eplenýän iPhone Fold bolar. Smartfon epin ýeri görünmeýän ekrany alar, epin ýeriniň görünmegi şeýle enjamlaryň esasy meselelerinden biridir. Içki displeýiň diagonaly 7,8 dýuým, daşky görnüşiňki - 5,5 dýuým bolar. Takmynan bahasy 2300 dollar töweregi bolar. Mundan başga-da, iPhone X-yň 10 ýyllygy mynasybetli ekranynyň aşagy kameraly we täze, üýtgeşik dizaýnly tutuş diýen ýaly çüýşeden durýan smartfon çykar.
Apple Glass äýnegi kameralar, ses ulgamy we ses kömekçisi bilen enjamlaşdyrylar. Enjamyň 2026-njy ýylyň aýagyndan soň çykmagyna garaşylýar we Meta Reý-Ban-a meňzeş bolar. Bu äýnek Vision Pro-nyň ýönekeýleşdirilen alternatiwasy bolar we gündelik ulanmak üçin dörediler. Gurmanyň maglumatyna görä, ol daşky gurşawy seljermäge we ulanyjynyň soraglaryna jogap bermäge ukyply Apple Intelligence funksiýasyny alar. Şeýle hem äýnek ýörite çip bilen üpjün ediler.
Şeýle hem bu kompaniýa Siri-ni kämilleşdirmegiň üstünde işleýär. Vision Pro-ny işläp taýýarlan topar ChatGPT derejesindäki AI modellerini durmuşa ornaşdyrar. Bu kömekçä has takyk we jikme-jik jogap bermäge mümkinçilik berer. Mundan başga-da, Apple AI hasaplamasyny çaltlaşdyrmak üçin täze serwer prosessorlaryny hem işläp taýýarlaýar.
Mehaniki goly bolan öý roboty iň garaşylmadyk işläp taýýarlama bolup biler. Şeýle-de bolsa, taslama entek başlangyç tapgyrda we onuň 2027-nji ýylda çykjagyna kepil ýok. Gurman, Apple Car bilen bolşy ýaly, Apple -iň käbir meýilnamalaryny gaýra goýup ýa-da ýatyryp biljekdigini belleýär.
