Täze «MAN eTGX» ýük ulagy Germaniýanyň Leýpsig we Regensburg şäherindäki BMW zawodlarynyň arasyndaky gatnawda üstünlikli synagdan geçip, uzak aralyga ýük daşamak üçin amatlydygyny subut etdi. Kuwwaty 544 at güýjüne çenli bolan elektrikli ýük ulagy her 100 kilometre bary-ýogy 75 kWt-sagat energiýa sarp edýär we 500 km çenli aralygy geçip bilýär. Bu barada kompaniýanyň metbugat gullugy habar berýär.
BMW bilen hyzmatdaşlyk edýän Elflein logistika kompaniýasy geljekde öz awtoparkyny tutuş elektrikli ulaglara geçirmegi meýilleşdirýär. Şeýlelikde, kömürturşy gazynyň bölünip çykarylyşy ýylda 3 müň tonna çenli azaldylar. «MAN eTGX» bu geçişiň möhüm bölegi bolup, kuzow detallary ýaly uly ölçegli ýükleriň daşalmagynda ýokary çeýelik mümkinçilikleri bilen tapawutlanýar.
375 kWt-a çenli tiz zarýad bermek mümkinçiligi we elektromobil infrastrukturasynyň kämilleşmegi bilen, «MAN eTGX» durnukly we ekologiýa taýdan arassa logistika ugrunda ösýän tendensiýanyň bir bölegi bolup durýar. Elektrikli ýük ulaglarynyň ulanylmagy daşky gurşawa ýetýän täsiri ep-esli azaldýar we ýükleriň daşalyşyny has netijeli guramaga ýardam berýär.
MAN we BMW kompaniýalary logistika ulgamynda elektrifikasiýany işjeň ösdürýärler. «MAN eTGX» eýýämden ýokary netijelilik we tygşytlylyk babatynda özüni subut etdi. Bu innowasiýalar ekologiýa taýdan arassa ulaglara we durnukly daşamalara geçiş döwrüniň golaýlaşýandygyny tassyklaýar.
