«Turkish Airlines» awiakompaniýasy uçar doly saklanmazdan we howpsuzlyk kemerleriniň çyrasy öçürilmezden öň ýerinden turýan ýolagçylara jerime salar. Bu barada «Akdeniz Gerçek» neşiri habar berýär.
Täze düzgünler Türkiýäniň Baş raýat awiasiýasy müdirligi (SHGM) tarapyndan çap edilen görkezmede beýan edilýär. «Turkish Airlines» awiakompaniýasy eýýämden uçardaky işgärlere düzgün bozýan ýolagçylary gözegçilikde saklamagy tabşyrypdyr.
«Uçar gonan badyna ýerinden turýan, üstki ýük bölümçelerini açýan ýa-da uçardaky işgärleriň duýduryşlaryna üns bermeýän ýolagçylara hereket edýän kanunçylyga laýyklykda jerime salnyp bilner» — diýlip beýanatda aýdylýar.
Awiakompaniýanyň wekili bu çäreleriň ýolagçylaryň howpsuzlygyny üpjün etmäge gönükdirilendigini belläp geçdi. Onuň sözlerine görä, uçaryň hereket edýän wagty ýolagçylaryň ýerinden turmagy ýa-da ýük bölümçelerini açmagy, köplenç, şikeslenmelere we dürli hadysalara sebäp bolýar.
