2024-nji ýylda Apple-iň diňe ABŞ-da App Store-dan gazanan girdejisi 10,1 mlrd dollara barabar boldy. Bu barada Appfigures analitiki kompaniýasyna salgylanyp, TechCrunch habar berýär. Bu kompaniýanyň programmalar dükanynyň töleg ulgamy arkaly amala aşyrylan her bir amaldan alan mukdarydyr.
ABŞ-da AppStore-yň umumy girdejisi 33,68 mlrd dollar boldy. Işläp düzüjiler 23,57 mlrd dollar aldy. Galan 10,1 mlrd dollar kupertinoly kompaniýanyň paýyna düşdi. Olardan 3,82 mlrd dollary oýunlardan, galan 6,27 mlrd dollary beýleki programmalardan gelýär.
2020-nji ýyldan bäri Apple-iň AppStore komissiýalaryndan alan girdejisi iki esseden gowrak ýokarlandy. Şol wagt ol 4,67 mlrd dollardy, 2021-nji ýylda – 6,66 mlrd dollar, 2022-nji ýylda – 7,37 mlrd dollar, 2023-nji ýylda – 8,75 mlrd dollar boldy.
Apple bu girdeji çeşmesini saklamak isleýär. Geçen hepde kazyýetiň karary boýunça, kompaniýa indi işläp düzüjileriň App Store-dan daşary töleg usullary barada ulanyjylara habar bermegine rugsat bermeli boldy. Şeýle töleglerde Apple komissiýa alyp bilmez.
Kompaniýa eýýäm çäklendirmeleri aýyrdy, ýöne munuň “ýüzlerçe million ýa-da milliardlarça dollar” ýyllyk ýitgä getirip biljekdigini aýdyp, çözgüdi togtatmak barada arza berdi.
Mundan başga-da, Apple Google-yň gözleg ulgamyny ulanýandygy üçin ondan alýan ýylda 20 mlrd dollaryny ýitirip biler. Kazyýet Google-y monopoliýaçy diýip ykrar edenden soň, Apple başga hyzmatdaşlary gözläp başlady. Bu hem Google-yň paýnamalarynyň pese gaçmagyna getirdi.
