Microsoft korporasiýasynyň esaslandyryjysy, milliarder we haýyr-sahawatçy Bill Geýts 20 ýylyň dowamynda şahsy baýlygynyň tas hemmesini diýen ýaly haýyr-sahawat işlerine bagyşlajakdygyny mälim etdi. Ol 200 milliard dollara barabar serişdäni öz «Gates Foundation» gaznasy arkaly paýlamagy göz öňünde tutýar.
«Geljekki 20 ýylyň dowamynda, dünýäniň dürli künjeklerindäki adamlaryň durmuşlaryny halas etmek we gowulandyrmak maksady bilen, ähli baýlygymy Geýts gaznasy arkaly bagyşlaryn. 2045-nji ýylyň 31-nji dekabrynda bolsa, gazna hemişelik ýapylar» — diýip, Geýts öz web sahypasynda ýazdy.
«Reuters» agentliginiň ýazmagyna görä, milliarder Ak tamyň administrasiýasynyň köp sanly amerikan kömek maksatnamalaryny azaltmagyndan ýa-da togtatmagyndan nägile eken. Geýts täze doglan bäbekleriň, çagalaryň we eneleriň «öňüni alyp boljak sebäplerden» ýogalmagynyň öňüni almak isleýändigini, şeýle hem poliomiýelit, gyzzyrma we gyzamyk ýaly keselleri ýok etmek hem-de garyplyk derejesini peseltmek isleýändigini beýan etdi.
«Ölenimden soň adamlar men hakda köp zat diýer, emma [şol gürrüňleriň arasynda] „Ol baý öldi“ diýen sözüň bolmazlygy üçin, men elimden gelen zady ederin» — diýip, ol aýtdy.
«CNN» neşiriniň bellemegine görä, Bill we onuň öňki aýaly Melinda tarapyndan 2000-nji ýylda esaslandyrylan gazna, başlangyçda, olaryň ölüminden soň hem onlarça ýyl işläp biljek gazna hökmünde meýilleşdirilipdir. Emma Geýts serişdeleri geçirmek prosesini çaltlaşdyrmaga karar berdi.
Gazna esaslandyrylan gününden bäri, AIDS, inçekesel we gyzzyrma garşy göreş maksatnamalaryny hem hasaba almak bilen, 100 milliard dollar bölüp beripdir.
«Bloomberg-iň» reýtingine görä, häzirki wagtda Bill Geýtsiň baýlygy 108 milliard dollar diýlip bahalandyrylýar.
