Tesla kompaniýasy ABŞ-da «Model Y» krossoweriniň yzky tekerlerden herekete getirilýän täze görnüşini hödürledi. Täze model has uzak ýol geçmäge ukyply bolup, arzan bahasy bilen tapawutlanýar. Bu barada «ITHome» portaly habar berýär.
Modeliň başlangyç bahasy 44 müň 990 dollar bolup, 7500 dollar federal salgyt ýeňilligi bilen umumy bahasy 33 müň 990 dollara çenli aşaklaýar.
Täze «Model Y-niň» esasy görnüşi 19 dýuýmlyk Crossflow diskler, çal reňkli kuzow we gara reňkli salon bilen enjamlaşdyrylan. Goşmaça töleg bilen başga reňkli kuzowy hem-de ak salony saýlap bolýar. Şeýle-de alyjylar 8000 dollara sürüji kömekçi ulgamy bolan FSD-ni hem goşup bilerler.
Awtoulaglar müşderilere ýene üç-bäş hepdeden gowşurylyp başlar, ýöne bu möhlet kompaniýanyň içki iş proseslerine baglylykda üýtgäp hem biler.
Tesla kompaniýasy 2025-nji ýylyň ahyryna çenli has elýeterli bahaly elektromobil çykarmagy hem meýilleşdirýär.
