Toyota Motor 2026-njy ýylyň mart aýynda tamamlanjak häzirki maliýe ýylynda operasion girdejiniň 21% azaljakdygyny çaklaýar. Bu barada Reuters agentligi habar berýär.
Kompaniýa geçen ýylky 4,8 trln ýena bilen deňeşdirilende 3,8 trln ýena (takmynan, 26 mlrd dollar) möçberde girdeji gazanmagyna garaşýar. Çaklama LSEG tarapyndan soralan 25 analitigiň ortaça çaklamasyna gabat gelýär.
Pese gaçyşyň esasy sebäpleri ABŞ-nyň Prezidenti Donald Tramp tarapyndan girizilen täze import paçlary, ýapon ýenasynyň gymmatlamagy we çig mallar hem materiallar üçin bahalaryň ýokarlanmagy boldy.
ABŞ-nyň nyrh çäreleri Toyota-nyň işi üçin töwekgelçilik döredýär. Olar diňe bir awtomobilleriň Amerika eksportyna däl, eýsem ABŞ-da we beýleki ýurtlarda awtomobillere bolan islegiň pese gaçmagyna getirip biler.
Şeýle-de, ABŞ-da işçi güýji üçin çykdajylaryň ýokarlanmagy we önümçiligi giňeltmek üçin maýa goýumlaryň zerurlygy geljekki maliýe netijelerine täsir edip biler.
Hytaý bazarynda Toyota-nyň satuwynyň pese gaçyşy beýleki ýapon awtoöndürijileri bilen deňeşdirilende az. Şeýle-de bolsa, umumy isleg hytaý brendleri tarapyndan bäsdeşligiň güýçlenmegi sebäpli peselmegini dowam etdirýär.
