Şotlandiýada Solueý-Fert aýlagynyň golaýynda iň gadymy futbol meýdançasynyň galyndylary tapyldy. Bu barada sport taryhçysy, Şotlandiýanyň futbol muzeýiniň esaslandyryjysy Ged O’Braýene salgylanyp, Independent habar berýär.
O’Braýen 1600-nji ýyllaryň başynda ruhany Semýuel Ruterford tarapyndan ýazylan haty tapdy. Onda Ruterford dindarlardan top oýnamagy gadagan etmek üçin meýdançada daşlary goýmagy haýyş edipdir. Taryhçynyň pikiriçe, adamlaryň ýekşenbe günleri futbol oýnamak islegini ruhany halamadyk bolsa gerek.
Daşlar häzirem meýdançada dur. Topragyň seljermesi olaryň hatyň ýazylan wagty ýerleşdirilendigini tassyklady. Independent-iň maglumatlaryna görä, 1600-nji ýyllarda futbol tertipsiz we ýowuz oýun bolupdyr. Onlarça oýunçy top hökmünde doňzuň peşew haltasyny ulanyp, şäherde ylgapdyr. Ýöne Ruterfordyň haty şol döwürler has guramaçylykly oýunlaryň hem geçirilendigini görkezýär. Ýagny, adamlar dynç günleri meýdança ýygnanyşypdyr.
Tapyndy 1863-nji ýylda oýnuň resmi düzgünlerini kesgitlän Angliýanyň Futbol assosiasiýasy döredilmezden iki asyr öň Şotlandiýada guramaçylykly futbolyň oýnalandygyny tassyklaýar.
Şol bir wagtyň özünde, Ged O’Braýen XVII asyryň oýnunyň näderejede häzirkizaman futbolyna meňzeş bolandygyna baha bermekçi däldigini aýtdy. “Bu häzirkizaman dünýä futbolynyň atasy” – diýip, ol belledi.
