Hyundai Jorjiýa ştatyndaky Metaplant America zawodynda adam şekilli Atlas robotlaryny ulanyp başlar. Bu iki aýakly maşynlar Boston Dynamics kompaniýasy tarapyndan işlenip düzüldi we öň adamlar tarapyndan ýerine ýetirilen işleri ýerine ýetirmek üçin niýetlenýär.
Geçen aý awtoöndüriji Boston Dynamics-den on müňlerçe şeýle roboty satyn almak kararyna geldi. Ol bu kompaniýany 2021-nji ýylda SoftBank-dan satyn aldy.
Häzir kompaniýa eýýäm dört aýakly Spot robotlaryny senagat barlaglaryny geçirmek üçin ulanýar. Şeýle-de, Jorjiýadaky zawodda gurnama hataryna iberilmezden ozal awtomobilleriň gapylaryny aýyrýan robot we prosesiň ahyrynda gapylary ýerine oturdýan robot ulanylýar.
Hyundai näçe sany Atlas robotynyň ulanyljakdygyny we olaryň haýsy işleri ýerine ýetirjekdigini aýtmaýar. Ýöne kompaniýa dünýädäki beýleki zawodlarynda hem önümçiligiň netijeliligini ýokarlandyrmak üçin robotlaryň ulanylyşyny giňeltmek isleýär.
Awtomatizirleme Hyundai-yň ABŞ-daky 21 mlrd dollarlyk maýa goýum meýilnamasyna girýär. Olardan 6 mlrd dollar innowasiýa, awtomatizirlemä we strategiki hyzmatdaşlyga gönükdirilýär.
Kompaniýanyň şeýle çözgüdiniň ýene bir sebäbi ABŞ-nyň Prezidenti Donald Tramp tarapyndan awtomobil importlaryna girizilen nyrhlar boldy. Hyundai-yň global satuwynyň geçen ýyl 2% azalandygyna garamazdan, ABŞ-da ol 4% ýokarlanyp, 1,9 mln awtomobil boldy.
Indi kompaniýa ABŞ-da önümçiligi ýylda 1,2 mln awtomobile çenli artdyrmagy meýilleşdirýär, bu 2024-nji ýylda garaşylan 700 000 awtomobil derejesinden 70% köpdür. Şeýle-de, Alabamadaky zawody giňeltmek göz öňünde tutulýar.
