Okamak adama dünýägaraýşyny giňeltmäge, täze zatlary öwrenmäge we durmuşy meseleleri çözmäge kömek edýär. Ol bilim, iş we hatda ruhy sagdynlyk üçin hem möhümdir. Maks Plank adyndaky Kognitiw we beýni ylymlary institutynyň hünärmenleri okan wagtyň beýniniň nähili işleýändigini, onuň haýsy bölekleriniň has işjeň bolýandygyny öwrenmek kararyna geldi diýip, Medical Xpress habar berýär.
Ylmy barlag okamaga we ýazmaga beýniniň çep ýarym şarynyň we beýnijigiň jogap berýändigini görkezdi.
Olar neýrowizuallaşdyryş usullaryny ulanmak bilen geçirilen 150 ylmy barlagy seljerip, harplary, sözleri we tekstleri gaýtadan işlemegiň çep ýarym şaryň bellibir böleklerini işjeňleşdirýändigini anyklady.
Mysal üçin, haçan-da biz harplary tananymyzda ýeňse böleginiň çep bölegi işleýär. Haçan-da sözleri ýa-da tekstleri okanymyzda, beýniniň goşmaça zolaklary işjeňleşip başlaýar.
Eger biz sesli okasak, onda beýni sesler we hereketler bilen baglanyşykly bölekleri işjeňleşdirýär.
Sözleri we “manysyz harplar toplumyny” içiňden aýdanyňda, çep maňlaý bölegi, çekge bölegi we beýnijik reaksiýa berýär. Sözüň manysyna düşünmek üçin ýumuşlar bolsa beýniniň iki bölegini-de, aýratynam, aşaky maňlaý we merkezi bölekleri işjeňleşdirýär.
Bu netijeler okanyňda beýniniň nähili işleýändigine has gowy düşünmäge kömek edýär. Olar okamakda kynçylyk çekýän, mysal üçin, disleksiýasy bolan adamlara kömek etmegiň usullaryny işläp taýýarlamak üçin möhümdir.
