Alymlar Ýaponiýada ozal näbelli kebelegiň daşa öwrülen galyndylaryny tapdy. Bu tapyndy Osakadan, takmynan, 180 km uzaklykda, Hiogo prefekturasynyň Sin’onsen şäherçesinde ýüze çykaryldy. Kebelegiň ganatynyň gerimi dokuz santimetre ýetipdir. Bu irki pleýstosen eýýamynda (2,6 – 1,8 mln ýyl ozal) ýaşan belli bolan kebelekleriň arasynda iň ulusydyr.
Täze görnüş bu galyndylary ilki gören Kiýosi Kamitaniniň hormatyna Tacola kamitanii diýlip atlandyryldy. Kebelek baradaky makala Paleontological Research žurnalynda neşir edildi.
Bu görnüş häzirkizaman öýküniji kebelekleri, mysal üçin, admirallary we wise-şalary öz içine alýan Limenitidini maşgalasyna degişlidir. Öň bu toparyň ýekeje wekiliniň-de daşa öwrülen galyndysy tapylmandy.
Ylmy gözlegçiler tapylan kebelegiň urkaçy bolandygyny öňe sürýär. Muny kebelegiň uly garny görkezýär. Şeýle tapyndylar, adatça, toprakda saklanmaýan kebelek ganatlarynyň näzikligi we bedeniniň ýumşaklygy sebäpli örän seýrekdir.
Alymlaryň hasaplamalaryna görä, kebelek pliosen döwründen pleýstosene geçilen döwürde ýyly ýa-da aram klimatda ýaşapdyr. Bu açyş Tacola nesliniň ýaýrawy baradaky maglumatlary giňeldýär – indi onuň diňe bir Günorta-Gündogar däl, eýsem Gündogar Aziýada hem ýaşandygy belli boldy.
