Toyota kompaniýasy 2026-njy ýyl «Corolla FX» hetçbegini hödürledi. Onuň dizaýny üçin 1987-nji ýylda çykarylan «Corolla FX16» modelinden ylham alnypdyr diýip, «Carscoops» habar berýär.
Täze model 18 dýuýmlyk ak diskler, gara spoýler we bagažyň gapagynda retro logotip bilen enjamlaşdyryldy. Bu model tehniki taýdan şol bir asma ulgamy we güýç gurluşy bilen adaty «Corolla» ýaly.
Awtoulag 169 at güýjüni öndürýän 2,0 litrlik benzinli hereketlendiriji bilen üpjün edilen. Geçiriş karobkasy – wariator görnüşli.
Salonynda zamşa bilen örtülen, mämişi tikinli sport oturgyçlar bar. Şeýle-de 7 dýuýmlyk sanly gurallar paneli we multimediýa ulgamynyň 8 dýuýmlyk ekrany oturdylan. Simsiz zarýad beriji we «Toyota Safety Sense 3.0» howpsuzlyk ulgamy hem elýeterli.
«Corolla FX 2026» çäkli nusgada çykarylar – jemi 1600 sany öndüriler. Bahasy heniz mälim edilmedi. Deňeşdirsek, 2025-nji ýyl «Corolla SE» hetçbeginiň esasy görnüşiniň bahasy 23 müň 780 dollardan başlaýar.
