Hristian-demokratik we Hristian-sosial bileleşikleriniň (HDB/HSB) blogunyň lideri Fridrih Mers resmi taýdan Germaniýanyň kansleri boldy. 6-njy maýda Bundestag ikinji synanyşykda onuň dalaşgärligini tassyklady diýip, Deutsche Welle habar berýär.
Mersi HDB/HSB-den dalaşgär hökmünde gerek bolan 316 deputatdan 325 deputat goldady.
6-njy maýda geçen ses berişligiň birinji tapgyrynda Merse sesleriň aglaba köplügini gazanmak başartmady. Ol 310 ses aldy. KHBS-iň maglumatlaryna görä, bu GFR-iň taryhynda şular ýaly ilkinji ýagdaý boldy.
Mers ýurduň taryhynda onunjy kansler boldy. Ol Germaniýanyň Sosial-demokratik partiýasy (GSDP) bilen koalisiýa hökümetine ýolbaşçylyk eder.
Bir gün öň, 5-nji maýda Berlinde Olaf Şols dabaraly ýagdaýda kansler wezipesinden ugradyldy. GFR-iň goranmak ministrliginiň howlusyndan fakelli harby esgerler geçdi.
Şols, däbe eýermek bilen, özi üçin ýaňlanar ýaly üç aýdym saýlady. Ilkibaşda The Beatles-iň “In My Life” aýdymy ýaňlandy (Şols Gamburgyň häkimi boldy, bu ýerde topar karýerasynyň başynda çykyş edipdi). Soňra orkestr Bahyň Ikinji Brandenburg konsertinden bir bölegi ýerine ýetirdi: Şols Brandenburg topragynyň paýtagty bolan Potsdamda ýaşaýar. Şondan soň Areta Frankliniň “Respect” aýdymy ýaňlandy, çünki “hormat” 2021-nji ýylda Şolsuň saýlawdan öňki kampaniýasynyň esasy sözi bolupdy.
