2025-nji ýylyň 5-nji maýyndan başlap, Skype öz işini doly bes edýär. Messenjeriň eýesi bolan Microsoft korporasiýasy bu barada ulanyjylara öňünden duýduryş beripdi.
Ulanyjylara iki mümkinçilik hödürlenýär: olar ähli kontaktlaryny we hasaplaryny saklap, Teams programmasyna geçip bilerler ýa-da hatlarynyň arhiwini göçürip alyp bilerler.
Skype – iň köne messenjerleriň biridir. Ol ilkinji gezek 2003-nji ýylda estoniýaly topar tarapyndan, Tele2 şwed kompaniýasynda işlän Niklas Zennstrem bilen Ýanus Friisiň gatnaşmagynda döredilipdi. Microsoft 2011-nji ýylda messenjeri 8,5 milliard dollara satyn alypdy.
Messenjer iň ýokary meşhurlyk döwründe, aýda 300 million ulanyja hyzmat edipdi we internet arkaly aragatnaşyk guramak üçin giňden ulanylýan gurallaryň birine öwrülipdi.
Korporasiýa hasaplary Teams-e geçirmek üçin ýörite görkezmeleri hem hödürledi we ähli maglumatlaryň goragly saklanjakdygyna kepil geçýär. Skype-yň ýapylmagy bu messenjeri şahsy hem-de iş maksady bilen ulanýan millionlarça adam üçin möhüm waka boldy.
