Emeli aňyň çalt ösmegi netijesinde bazar bahasy 3 trillion dollara ýeten Nvidia kompaniýasy baş direktory Jensen Huangyň aýlygyny ep-esli artdyrdy. ABŞ-nyň Gymmatly kagyzlar we birža komissiýasyna (SEC) tabşyrylan täze resminama görä, Huangyň esasy zähmet haky 10 ýylyň dowamynda ilkinji gezek 50% ýokarlandy, indi onuň aýlyk haky 1,5 million dollar boldy. Häzirki maliýe ýylynyň dowamynda, Huangyň jemi girdejisi 49,9 million dollar bolar diýlip çaklanylýar. Munuň 38,8 million dollary paýnamalardan we beýleki çeşmelerden gazanylar diýip, «Wccftech» habar berýär.
Deňeşdirsek, Nvidia-nyň işgärleriniň ortaça ýyllyk zähmet haky 300 müň dollar töweregi. Diýmek, Huang beýleki işgärlerden 166 esse köp gazanýar. Bu ýagdaý kompaniýanyň ägirt uly ösüşi bilen baglanyşyklydyr. Mysal üçin, AMD-niň ýolbaşçysy Liza Sunyň esasy aýlygy hem 1,26 million dollar, ýagny Huangyňkydan az.
Jensen Huang 97,9 milliard dollarlyk baýlygy bilen, Bloomberg-iň milliarderler sanawynda 17-nji orunda durýar. Onuň baýlygynyň köp bölegi Nvidia-daky paýnamalaryndan gelýär. Kompaniýanyň paýnamalarynyň bahasynyň çalt ýokarlanmagy onuň bu sanawdaky ornuny has-da berkidýär. Şeýle-de bolsa, Nvidia täze kynçylyklar bilen ýüzbe-ýüz bolýar: Trampyň administrasiýasy kompaniýanyň Hytaý ýaly möhüm bazarlardaky ornuny saklamagyny kynlaşdyrýar.
