«Jeýms Uebb» teleskopy örän sowuk ekzoplanetanyň üstüni açdy. «WD 1856+534 b» belgili ekzoplanetanyň atmosferasynyň temperaturasy −87°C bolup, ol Ýupitere we Saturna meňzeýär diýip, «Space.com» habar berýär.
Alymlar ýaşaýyş üçin zerur bolan şertleriň diňe Gün ulgamynda däl, eýsem, beýleki ýerlerde hem bardygyny-ýokdugyny öwrenýärler. Ýupiter bilen Saturnyň atmosferasy −100°C-den hem sowuk bolýar. Alymlar häzirki wagta çenli şeýle sowuk ekzoplanetany tapmandylar. Şol sebäpdenem täze açyş bu ugurdaky möhüm ädim bolup durýar.
«WD 1856+534 b» diýlip atlandyrylýan ekzoplaneta bir ak girdenegiň, ýagny sönüp giden ýyldyzyň töwereginde aýlanýar. Ekzoplaneta öz ýyldyzyndan, takmynan, ýedi esse uly. Bu ýagdaý ekzoplanetanyň öz ýyldyzynyň gyzyl äpet döwründen geçip, daşky gatlagy taşlananda hem ýok bolman, aman galandygyny görkezýär. Bu hem ýyldyz ulgamlarynyň ösüşini öwrenmek üçin möhüm maglumatlary berýär.
Ýene bir gyzykly zat, bu ekzoplaneta, ähtimal, öz ugruny başdaky orbitasyndan üýtgeden bolmaly. Munuň nädip beýle bolandygy entek düşnüksiz bolsa-da, onuň häzirki wagtda ýaşaýyş zolagynda ýerleşýän bolmagy mümkin. Bu ýagdaý bolsa, ol ýerde ýaşaýşyň hem bolup biljekdigini aňladýar.
