28-nji aprelde Ispaniýada elektrik togunyň sebit derejesinde öçmegi ýurduň ykdysadyýetine uly zyýan ýetirip biler. RTVE bilen geçirilen gürrüňdeşlikde bilermenleriň aýtmagyna görä, ýeten zyýanyň möçberi 1 mlrd – 4,5 mlrd ýewro aralygynda üýtgeýär. Bu mukdarlar tok öçmesiniň dowamlylygyna we dürli pudaklara ýetiren täsirine baglydyr.
Granada uniwersitetiniň ykdysadyýet boýunça professory Fransisko Rodrigesiň aýtmagyna görä, bu waka ýurduň ýyllyk jemi içerki önüminiň 0,3%-ne çenli zyýan ýetirip biler.
«Eger-de paralizasiýa bütin gün dowam eden bolsady, ýitgi, takmynan, 4,5 mlrd ýewro bolardy. Emma günortandan soň elektrik üpjünçiliginiň gaýtadan dikeldilmegi kärhanalaryň işini bölekleýin dowam etdirmegine mümkinçilik berdi» — diýip, ol aýtdy.
ESADE-den professor Pedro Asnar hakyky zyýanyň Ispaniýanyň bir günlük JIÖ-niň 20-25%-ne barabar bolandygyny belleýär, bu bolsa 1,1 mlrd – 2,25 mlrd ýewro aralygynda bolýar. Ispaniýanyň telekeçi guramalarynyň konfederasiýasy (CEOE) bolsa, zyýanyň möçberini 1,6 mlrd ýewro diýip hasaplady, bu bolsa ýurduň JIÖ-niň, takmynan, 0,1%-ne deňdir.
Bu waka diňe bir Ispaniýa däl, eýsem Portugaliýa, Andorra hem-de Fransiýanyň käbir sebitlerine hem täsir etdi. Toguň näme sebäpden öçendigi henizem belli däl, emma bu wakanyň kiberhüjüm bilen baglanyşykly däldigi tassyklandy.
Bu wakanyň netijesinde, azyndan, bäş adam ýogaldy. 29-njy aprel irdene çenli, Ispaniýadaky öýleriň 99,16%-ne elektrik üpjünçiligi gaýtadan dikeldildi.
