Geçen dynç günleriniň jemi boýunça “Şalaryň şasy” multfilmi ABŞ-da 54,7 mln dollar gazandy. Film meşhur bolan “Mugthorlar” filminden ($53,8 mln) öňe geçip, amerikan prokatynda iň girdejili koreý kinotaslamasy boldy diýip, Deadline habar berýär.
Multfilmiň umumy kassa ýygymy 5 mln dollar býujetde 57,8 mln dollara ýetdi.
Ol tomaşaçylardan örän ýokary bahalara eýe boldy, bu hem taslamanyň Demirgazyk Amerikada meşhur bolmagyna oňyn täsir etdi.
“Şalaryň şasy” iňlis nusgawy ýazyjysy Çarlz Dikkensiň “Hudaýymyz Iisus Hristosyň durmuşy” powestiniň koreý ekranlaşdyrmasydyr. Onuň režissýory Son Ho Çan boldy.
“Kakasy ogluna dünýä taryhyny gürrüň berýär we gijeki erteki hökmünde başlanan zat onuň durmuşyny üýtgedýän kyssa öwrülýär. Öz hyýallary bilen oglanjyk özi üçin umyt bilen söýginiň baky güýjüni açjak täsinlikler dünýäsine çümýär” – diýip, animasion filmiň beýanynda aýdylýar.
Taslamada baş keşplere golliwudly ýyldyzlar ses berdi: Kennet Brana (“Gündogar otludaky ölüm”, “Nildäki ölüm”), Pirs Brosnan (“Öl, ýöne häzir däl”), Uma Turman (“Billi öldürmek”), Oskar Aýzek (“Dýuna”), Mark Hemill (“Ýyldyz söweşleri’), Ben Kingsli (“Tebip: Awisennanyň okuwçysy”, “Näletlenenleriň adasy”), Forest Uitaker (“Şotlandiýanyň soňky patyşasy”) we beýlekiler.
