Mart aýynyň ahyrynda Kanadanyň Kwebek welaýatynyň Bromon şäherindäki Roland-Desurdi howa menzilinde wodorodly ýangyç elementleri bilen işleýän Robinson R44 dikuçarynyň ilkinji uçarmanly uçuşy üstünlikli synag edildi. Synaglar emeli usulda ösdürilip ýetişdirilen organlary daşamak üçin howa ulaglaryny işläp düzmek bilen meşgullanýan United Therapeutics kompaniýasynyň golçur kärhanasy tarapyndan gurnaldy diýip, «NotebookCheck.net» habar berýär.
Dikuçar 3 minut 16 sekunt howada uçdy. Energiýanyň, takmynan, 90%-i ýangyç elementlerinden alnan bolsa, galan bölegi akkumulýator batareýasy bilen üpjün edildi. Dikuçary uçarman Rik Uebb dolandyrypdyr.
Dikuçaryň guýrugynyň aşagynda ýerleşdirilen wodorod saklaýyş ulgamy gaz halyndaky wodorody ulanýar, ýöne 2025-nji ýylda suwuk wodoroda geçmek meýilleşdirilýär. Bu ädim uçuş aralygyny artdyrar, bu bolsa organ daşamak boýunça ýerine ýetirilýän missiýalar üçin örän möhüm hasaplanylýar.
Dikuçaryň elektrohereketlendirijisi MagniX kompaniýasy tarapyndan döredildi. Ýangyç elementlerini gowy sowatmak üçin uly daşarky modullar ulanylýar. Kämilleşdirmeler Unither we Robinson Helicopter kompaniýalarynyň bilelikde alyp barýan Proticity taslamasynyň çäginde amala aşyrylýar. Kompaniýalar indi has ykjam wodorod ulgamy bilen enjamlaşdyrylan, üýtgedilen R66 dikuçarynyň uçuş synaglaryna başlamagy meýilleşdirýär.
