Çiliniň Atakama çölünde ýerleşýän dünýäniň iň uly teleskoby bolan Extremely Large Telescope (ELT) teleskobynyň gümmeziniň we süýşürilýän gapylarynyň gurluşygy tamamlandy. Bu barada «PetaPixel» habar berýär.
Diametri 93 metr, beýikligi bolsa 80 metr bolan gurluşda Ýewropanyň günorta obserwatoriýasynyň (ESO) we Çiliniň baýdaklary asyldy.
Işleriň indiki tapgyry – optiki enjamlaryň, şol sanda diametri 39 metr bolan esasy aýnanyň (M1) oturdylmagy bolar.
ELT iň güýçli optiki teleskop bolar, ol astronomlara ekzoplanetalary, irki galaktikalary we gara maddanyň häsiýetlerini öwrenmäge kömek eder.
Neşir edilen suratlarda gümmeziň üstünde Akmaýanyň ýolunyň kümüşsöw guşagy görünýär. Açylan üçekden optiki ulgamyň oturdyljak metal gurluşy göze ilýär.
Gümmez enjamlary Atakama çölüniň ýowuz şertlerinden goraýar. Gündizlerine ýapylýar, gijelerine bolsa gözegçilik üçin açylýar. Teleskop ilkinji suratlary 2028-nji ýylda düşürip başlar.
