26-njy aprelde Türkmenistanyň Halk Maslahatynyň Başlygy Gurbanguly Berdimuhamedow Eýran Yslam Respublikasynyň Prezidenti Masud Pezeşkian bilen telefon arkaly söhbetdeşlik geçirdi.
Söhbetdeşligiň başynda Gurbanguly Berdimuhamedow Bender-Abbas portunda bolup geçen partlama zerarly öz adyndan, şeýle-de Prezident Serdar Berdimuhamedowyň adyndan goňşy döwletiň Baştutanyna we Eýranyň halkyna çuňňur gynanjyny hem-de duýgudaşlyk sözlerini beýan etdi.
Türkmen halkynyň Milli Lideri Türkmenistanyň Eýranyň ýakyn goňşusy hökmünde partlama zerarly ejir çekenlere lukmançylyk we beýleki ähli zerur kömegi bermäge taýýardygyny nygtady. Eýran Yslam Respublikasynyň Prezidenti hoşallyk bildirip, şu çylşyrymly pursatda Türkmenistanyň Halk Maslahatynyň Başlygynyň ilkinji bolup öz goldawyny bermek baradaky teklibini beýan edendigini belledi.
Söhbetdeşligiň dowamynda Gahryman Arkadagymyz hem-de Prezident Masud Pezeşkian ikitaraplaýyn hyzmatdaşlygyň ösüşi barada pikir alyşdylar, şeýle hem sebit we halkara gün tertibiniň özara gyzyklanma bildirilýän käbir meselelerini ara alyp maslahatlaşdylar.
26-njy aprelde irden Eýranyň iri söwda porty hasaplanýan Şahid Rajaide güýçli partlama bolup geçdi. IRNA eýran agentliginiň ýerli häkimiýetlere salgylanyp habar bermegine görä, partlama netijesinde azyndan 25 adam aradan çykdy, 1139 adam dürli görnüşli şikes aldy.
Portuň ýerleşýän şäheri bolan Hormozganda üç günlük hatyra yglan edildi.
