UEFA täze möwsümden Çempionlar ligasynyň düzgünlerini üýtgetmek mümkinçiligini öwrenýär. Bild-iň maglumatlaryna görä, gurama täze düzgünleri girizmek barada klublar bilen pikir alyşýar.
Teklipleriň biri – pleý-off oýunlarynda goşmaça wagty aýyrmak. Iki oýnuň netijesinde hasap deňme-deň bolan ýagdaýynda penalti tapgyryny bellemek teklip edilýär. Bu üýtgeşmeler oýunçylaryň fiziki taýdan ýadamagy bilen baglanyşyklydyr.
Şeýle-de, umumy tapgyryň jedwelindäki gönüden-göni 1/8 finala çykýan ilkinji 8 topar üçin täze düzgün ara alnyp maslahatlaşylýar. Olara pes orunlary eýelän toparlar bilen ähli pleý-off tapgyrlarynyň jogap oýunlaryny öýünde oýnamak teklip edilýär. Häzire çenli bu düzgün diňe 1/8 finala degişlidi. Mysal üçin, “Arsenal” (umumy tapgyryň netijesi boýunça 3-nji) çärýek finalda “Real” (11) bilen duşuşdy, ýöne jogap oýnuny öz öýünde oýnamak hukugyny gazanmady. Eger täze düzgün eýýäm häzir hereket edýän bolsa, “Arsenal” “PSŽ” (15) bilen birinji ýarym final oýnuny Londonda däl-de, Parižde geçirerdi.
Mundan başga-da, UEFA bir ýurtdan bolan klublaryň biri-biri bilen dörtden bir finala çenli duşuşmazlygyny gazanmak isleýär. Çünki, irki tapgyrlarda şeýle oýunlar janköýerler we telewideniýe üçin kän bir özüne çekiji hasaplanmaýar.
UEFA-nyň Ýaryşlar boýunça komiteti bu üýtgeşmeler barada gutarnykly çözgüdi 30-njy maýda Mýunhendäki assambleýada kabul edip biler. Eger Komitetiň çözgüdi oňyn bolsa, teklipler UEFA-nyň ýerine ýetiriji komitetine tassyklamak üçin geçiriler.
