Kia kompaniýasy Nýu-Ýorkdaky (ABŞ) awtosalonda täze elektrosedany «EV4-iň» global görnüşini hödürledi. Bu dört gapyly model «Tesla Model 3» bilen bäsleşmek üçin ýörite taýýarlanyldy.
«EV4-iň» dizaýny Kia-nyň «EV6» we «EV9» modellerine meňzeýär, ýöne bu model has sport äheňde işlenip düzülipdir. Ol uly dik faralary, piksel şekilli optikalary, fastbek görnüşli üçek çyzygy we iki bölümli spoýleri bilen tapawutlanýar. Ol topluma görä, 17 ýa-da 19 dýuýmlyk tekerler bilen üpjün edilýär.
Salony minimalistik äheňde taýýarlanypdyr. Merkezi panelde biri-birine bagly 12,3 dýuýmlyk iki sany ekran we klimat ulgamyny dolandyrmak üçin aýratyn 5 dýuýmlyk ekran bar. Şeýle hem Apple CarPlay, Android Auto we uzak aralykdan täzelenmeleri (OTA) goldaýar. Şeýle-de sesli kömekçi, iki zolakly klimat-kontrol, oturgyçlaryň gyzdyrylmagy we şemalladylmagy, şeýle hem ruluň gyzdyrylmagy ýaly aýratynlyklar bar.
«EV4» modeli 400-woltlyk arhitekturasy bolan E-GMP platformasynyň binýadynda gurulýar. Ähli görnüşler öňdäki tekerlerden herekete getiriji ulgam we 204 at güýjüni öndürýän elektromotor bilen enjamlaşdyrylýar. Bir gezeklik zarýad bilen 378-den 531 kilometre çenli ýol geçip bilýär.
Täze modeliň satuwyna Ýewropada 2025-nji ýylyň ahyrynda, ABŞ-da bolsa 2026-njy ýylyň başynda başlanylar. Bahasy entek mälim edilmedi.
