Hytaýda geçirilýän Türkmenistanyň Medeniýet ýylynyň çäklerinde Şensi welaýatynyň Sian şäherinde ýurdumyzyň sungat ussatlarynyň konserti geçirildi.
Konsert zalynyň eýwanynda türkmen artistleriniň wekiliýeti Türkmenistan barada fotosurat sergisini gurady. Hytaýly tomaşaçylar Türkmenistan, Aşgabat, Arkadag şäheri we beýleki gözel ýerlerimiz hakynda gürrüň berýän fotosuratlara uly gyzyklanma bilen syn etdiler. Monitorda ýurdumyzyň köp ugurlarda gazanan ykdysady üstünlikleri görkezildi.
Konserti «Dehistan» folklor-etnografik topary açdy. Çykyşlaryň dowamynda hytaýly tomaşaçylar milli lybaslar, türkmen halkynyň toý dabaralary we dostlukly, parahatçylygy söýýän ýurduň meşhur watançylyk hem liriki aýdymlary bilen tanyşdylar.
Konsertde türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň «Ýaşasyn parahat durmuş» we Magtymguly Pyragynyň sözlerine kompozitor Weli Muhadowyň döreden «Uýat eýleýir», «Garlawaç» aýdymlary ýaňlandy.
Türkmenistanyň halk artisti Atajan Berdiýew «Ene» atly aýdymyny hytaý dilinde ussatlarça ýerine ýetirdi.
Sazandalar Myrat Aşyrow we Sarwar Sabirow dutarda we doýrada ýaryş gurap çykyş etdiler. Çykyş wagty «Şükür bagşy» atly filminden parçalar görkezildi.
Konserte Şensi welaýat halk hökümetiniň gubernatorynyň orunbasary hem gatnaşdy.
Konsert ÝUNESKO-nyň Adamzadyň maddy däl medeni mirasynyň sanawynda möhüm orun eýelän «Küştdepdi» milli tansy bilen tamamlandy.
Konserte gatnaşyjylaryň hemmesi tomaşaçylara hoşallyk bildirmek üçin sahna çykdy, olaryň arasynda aýdymçy Aky Ýagşygeldiýewa, Munisa Hudaýbergenowa, Gurbangylyç Nurgylyjow we beýlekiler bardy.
