2025-nji ýylyň 17-nji aprelinde Hytaýyň Tsindao şäherinde balyk we beýleki deňiz önümlerini ösdürip ýetişdirmek üçin, 150 müň tonnalyk akylly gämi işe girizildi.
Bu gämi 2022-nji ýylda işe girizilen dünýäde ilkinji ferma gämisi bolan «Guoxin 1-iň» kämilleşdirilen görnüşidir.
Täze «Guoxin 1 №2-1» atly gäminiň uzynlygy 245 metr (takmynan, iki futbol meýdançasy ýaly), ini bolsa 45 metr. Rezerwuarlaryň umumy göwrümi 100 müň m³. Gäminiň ýyllyk balyk öndürijilik kuwwaty – 3600 tonna.
Bu ýerde, esasan, sary gorbyl, losos we forel ösdürilip ýetişdiriler.
Gämide 15 sany akwakultura moduly, dört sany akymly tegelek howuz we 22 sany synag rezerwuary bar. Gämidäki işleriň 90%-i mehanizirlenen, olaryň 45%-i bolsa doly awtomatlaşdyrylan. Bu bolsa zähmet çykdajylaryny 20% azaldýar.
«Bu diňe bir gämi däl, eýsem tutuşlygyna ýapyk aýlawly ýüzýän zawod» — diýip, işläp düzüjileri belleýär. Gämi awtomatlaşdyrylan iýmitlendiriş ulgamlaryny, suwuň hiline sanly gözegçiligi we tutulan balyklary gaýtadan işlemek üçin «akylly» çözgütleri ulanýar.
2025-nji ýylyň oktýabrynda «Guoxin 1 №2-2» atly ýene bir gäminiň hem bu flotuň düzümine goşulmagyna garaşylýar.
