Hytaýyň Senagat we maglumat tehnologiýalary ministrligi awtoulag öndürijilere «akylly sürüş» we «awtonom sürüş» diýen sözleri mahabat materiallarynda ulanmagy gadagan etdi. Bu karar mart aýynda «Xiaomi SU7» elektrosedany bilen bolan heläkçilikli ýol hadysasyndan soň kabul edildi diýip, «Reuters» neşiri habar berýär.
Derňewiň netijesine görä, ýol heläkçiligi sürüjiniň ADAS kömekçi ulgamynyň öçürilmeginden birnäçe sekunt soň, dolandyryşy öz eline almagy bilen ýüze çykypdyr. Şol wagt awtoulag sagatda 97 kilometr tizlige ýetip, beton sütün bilen çaknyşypdyr.
Indi ähli awtoulag öndürijileri sürüjä ýardam berýän ulgamlaryň islendik uzakdan täzelenmelerini döwlet gözegçilik edaralary bilen ylalaşmaly we olary ulanyşa girizmezden öň doly synagdan geçirmeli bolarlar. Gadaganlyk 2025-nji ýylda çykjak täze awtoulaglara gurlan ADAS täzelenmelerini hem öz içine alýar diýip, «Reuters» neşiri ýazýar.
Täze düzgünleriň tehnologiýalaryň ýaýraýyş tizligine täsir etmegine garaşylýar. Ýöne bu çäreler bazardaky durnuksyzlygy peseltmäge we gaty çalt ösýän elektrikli awtoulag (EV) pudagyndaky howplary azaltmaga kömek eder. Häzirki wagtda Hytaýda elektrik we gibrid ulaglaryň paýy eýýäm 50%-den geçýär.
