ÇL-iň 1/4 finalynyň jogap oýunlary: “Arsenal” “Realy” ýene utdy, “Inter” “Bawariýany” aýyrdy

  • 17.04.2025 11:11
  • 9.2k+

Çempionlar ligasynyň 1/4 finalynyň jogap oýunlarynda ýene iki ýarym finalçy belli boldy. Londonyň “Arsenaly” Madridiň “Realyndan” üstün çykdy, Milanyň “Interi” bolsa iki duşuşygyň jemi boýunça Mýunheniň “Bawariýasyndan” güýçli boldy.

“Arsenal” Madrid klubuny “Santýago Bernabeuda” 2:1 hasabynda utdy. Birinji oýunda 3:0 hasabynda utandan soň, “Arsenalyň” gowy artykmaçlygy bardy. Oýnuň başynda “Real” garşydaşyny derwezä gysmaga çalyşdy, ýöne “Arsenal” hüjüm bilen ynamly jogap gaýtardy. 11-nji minutda VAR-a seredilenden soň, emin Asensionyň düzgüni bozandygy üçin, “Realyň” derwezesine penalti belledi, ýöne Saka gol geçirip bilmedi, Kurtua urgyny yzyna gaýtardy.

Birinji ýarymyň ortasynda “Real” hem penalti üçin hukuk gazandy, ýöne emin bäş minutlyk arakesmeden soň ofsaýd belläp, ony ýatyrdy.
Oýnuň ikinji ýarymynda londonlylar hasaby açdy – 65-nji minutda Saka gol geçirdi. “Real” hem 67-nji minutda Winisiusyň kömegi bilen hasaby deňledi. 93-nji minutda “Arsenalyň” wingeri Martinelli gutarnykly hasaby goýdy – 2:1.
Şeýlelikde, “Arsenal” iki oýnuň jemi boýunça 5:1 hasabynda utup, indiki tapgyra çykýar.

Günüň beýleki bir oýnunda “Inter” “Bawariýa” bilen deňme-deň oýnady – 2:2. Bu hem italýan toparynyň birinji duşuşykda 2:1 hasabyndaky ýeňşinden soň ýaryşy dowam etdirmegi üçin ýeterlik boldy.
Milandaky “Juzeppe Meassa” stadionynda geçen oýunda ähli gollar arakesmeden soň salyndy. 52-nji minutda hasaby myhmanlaryň hüjümçisi Garri Keýn açdy. “Inter” hem 5 minutdan jogap berdi: hasaby Lautaro Martines deňledi. 61-nji minutda mýunhenlileriň öňki oýunçysy Benjamen Pawar “Interi” öňe çykardy.

“Bawariýa” 76-njy minutda Erik Daýeriň goly bilen hasaby deňledi – 2:2. Ýöne bu ýarym finala çykmak üçin ýeterlik bolmady – iki oýnuň jemi boýunça “Inter” utdy (4:3).
1/2 finalyň garşydaşlary

  • “Arsenal” (Angliýa) – “PSŽ” (Fransiýa)
  • “Barselona” (Ispaniýa) – “Inter” (Italiýa)

Ilkinji ýarym final oýunlary 30-njy aprele we 1-nji maýa geçilýän gije geçiriler, finalçylar bir hepde soň jogap oýnunda belli bolar.


düýn 14:05
5.8k+

“Liwerpul” ÇL-iň taryhynda klubuň iň ýaş oýunçysy bilen professional şertnama baglaşdy

“Liwerpul” häzire çenli Çempionlar ligasynda klub üçin çykyş eden iň ýaş oýunçy bolan Treýmoris Nýoni bilen şertnama baglaşandygyny habar berdi. 30-njy iýunda 18 ýaşyny dolduran güni ýarymgoragçy ilkinji professional şertnamasyny baglaşmaga mümkinçilik gazandy...

düýn 11:49
5.3k+

Klublaýyn dünýä çempionaty: “Real” “Ýuwentusy” utdy we çärýek finalda “Borussiýa” bilen oýnar

Madridiň “Realy” Klublaýyn dünýä çempionatynyň 1/8 finalynda Turiniň “Ýuwentusyny” utdy. Oýun Maýamide geçirildi we 1:0 hasabynda tamamlandy. Ýeke-täk goly 54-nji minutda Gonsalo Torres geçirdi. 1/4 finalda “Real” Meksikanyň “Monterreý” klubuny 1:2 hasabynda utan Dortmundyň “Borussiýasy” bilen duşuşar...

01.07.2025 18:17
5.1k+

“Bawariýa” erkin agent hökmünde klubdan giden Zane we Daýer bilen hoşlaşdy

Mýunheniň “Bawariýasy” merkezi goragçy Erik Daýer we winger Leroý Zane bilen hoşlaşdy. Futbolçylaryň ikisiniň hem nemes kluby bilen şertnamasy 2025-nji ýylyň 30-njy iýunyna çenli hereket edýärdi. Şeýlelikde, oýunçylar kluby erkin agent hökmünde terk etdi...

30.06.2025 11:10
7.8k+

«PSŽ» «Bawariýa» bilen duşuşar: Klublaýyn dünýä çempionatynyň ikinji çärýek finalçylary belli boldy

2025-nji ýylyň Klublaýyn dünýä çempionatynyň pleý-off oýunlarynyň 1/8 finalynyň ýene iki duşuşygy tamamlandy. Olaryň netijesinde ýaryşyň dörtden bir finalynyň ikinji garşydaş toparlary belli boldy. “PSŽ” “Inter Maýamini” jogapsyz 4:0 hasabynda utdy...