Ilkinji gezek 2023-nji ýylyň iýulynda çykan Disney Illusion Island oýny 30-njy maýda PlayStation 5, Xbox Series X/S konsollarynda we PK-da (Steam, GOG, Microsoft Store) elýeterli bolar.
Oýunçylara dört sany belli gahrymandan birini – Mikki Mausy, Minni Mausy, Donald Daky ýa-da Gufini saýlamak we Monat adasy boýunça syýahata ugramak teklip edilýär. Olar adany howpdan halas etmeli.
Oýun birbada dört gatnaşyjynyň topar bolup oýnamagyna mümkinçilik berýär. Her bir personažyň toparlaýyn oýunda kömek edýän özboluşly başarnyklary bar.
Täze platformalar üçin oýun wersiýasy ozal çykan Keeper Up we Mystery in Monoth täzelenmesini hem-de täze Cave Adventuring Scavenger Hunt (C.A.S.H.) goşundysyny öz içine alýar. Onda Skruj MakDak we gizlin hazynalary tapmaga mümkinçilik berýän täze “Dig” ukyby peýda bolar.
Metacritic-de oýun 10-dan 7 bal aldy. Taslamanyň sahypasy eýýäm Steam-de elýeterli. PlayStation we Xbox üçin nusgalar 30-njy maýda Demirgazyk Amerikada we 27-nji iýunda Ýewropada satuwa çykar.
