BMW 5 seriýasyna degişli sedanlary Hytaýda uly arzanladyşlar bilen satuwa çykardy. «Autohome-yň» maglumatlaryna görä, ulaglaryň bahalary 35%-e çenli aşaklady. Indi bu modelleri, takmynan, 280 müň ýuana (takmynan, 34 müň ýewro ýa-da 38 müň dollara) satyn alyp bolýar.
Beýle uly arzanladyşyň esasy sebäbi, BMW-Brilliance zawodyndaky ammarlarda awtoulaglaryň aşa köp ýygnanyp galmagy boldy. Dilerler awtoulaglary tizräk satmak üçin, yzygiderli arzanladyşlary hödürleýärler. Mysal üçin, Pekinde kredit bilen awtoulag alanyňda, müşderi 160 müň ýuana (takmynan, 22 müň dollara) çenli pul tygşytlap biler, kredit boýunça göterimler bolsa, 26 müň ýuandan (takmynan, 3,5 müň dollardan) geçmeýär.
5 seriýasynyň hytaý wersiýasy teker bazasynyň 110 millimetr uzaldylanlygy we goşmaça opsiýalary bilen tapawutlanýar. Yzky tekerlerden herekete getirilýän «525Li» esasy modeliniň bahasy häzirki arzanladyş bilen 280 müň ýuan. 2024-nji ýylyň ýanwarynda onuň başlangyç bahasy 440 müň ýuandy (takmynan, 53 müň ýewro). Umuman, Hytaýda BMW 5 seriýasynyň bahasy Germaniýadakydan 40% arzan, sebäbi ol ýerde bu modeli 59 müň ýewrodan arzan satyn alyp bolmaýar.
5 seriýasynyň ähli görnüşleri boýunça arzanladyşlaryň möçberi 100-120 müň ýuan aralygynda (takmynan, 14-16 müň dollar). Şuňa meňzeş arzanladyşlar beýleki modellerde-de bar. 3 seriýanyň sedanlarynda arzanladyş 55%-e çenli ýetýär, «X3» krossowerleri bolsa ýyllyk 0% göterimli karz bilen hödürlenýär. «iX3» kysymly elektromobiller bolsa, islegiň pesligi sebäpli önümçilikden aýryldy.
2025-nji ýylyň birinji çärýeginde BMW-niň Hytaýdaky awtoulag satuwy 17% peseldi.
