Türkmenistanyň türgenleri dünýäniň dürli ýurtlarynda geçirilen sport ýaryşlaryna gatnaşyp, baýrakly orunlara mynasyp boldular. "Türkmenistan" gazeti türkmen türgenleriň üstünlikleri barada habar berýär.
5 — 10-njy aprel aralygynda Tailand Patyşalygynyň Bangkok şäherinde suwda ýüzmek boýunça dürli ýaşdaky türgenleriň arasynda halkara ýaryş geçirildi. 16 — 18 ýaşly türgenleriň arasynda suwda ýüzmegiň batterflaý görnüşi boýunça 50 metr aralyga ildeşimiz Dawid Akopýanyň görkezen netijesi hemmeleri haýran galdyrdy. Has takygy, Aşgabat şäherindäki 15-nji orta mekdebiň 12-nji synp okuwçysy şu görnüş boýunça altyn medala mynasyp boldy hem-de ýaryşyň rekordyny täzeledi. Halkara ýaryşa dünýäniň 6 döwletinden 40 sany sport kluby, şeýle hem 500-den gowrak türgen gatnaşdy.
Agyr atletika boýunça ýurdumyzyň ýaş türgenleriniň 6 — 11-nji aprel aralygynda Özbegistanyň Daşkent şäherinde geçirilen halkara ýaryşda gazanan üstünlikleri hem bellenilmäge mynasypdyr. Onda Lebap welaýatynyň Saýat etrabyndaky 35-nji orta mekdebiň 10-njy synp okuwçysy Gülzada Hudaýberdiýewa 61 kilogram agram derejede çykyş edip, ştangany silterläp galdyrmakda bürünç, itekläp galdyrmakda kümüş, umumylykda hem kümüş medala mynasyp boldy. Şol ýaryşda 67 kilogram agram derejede çykyş eden paýtagtymyzdaky Ýaş olimpiýaçylary taýýarlaýyş mekdebiniň 10-njy synp okuwçysy Dawut Kakageldiýew ştangany itekläp galdyrmakda bürünç medaly eýeledi. Agyr atletika boýunça ýaşlaryň we ýetginjekleriň arasynda geçirilen bu ýaryşa 6 döwletden 90-a golaý türgen gatnaşdy.
5 — 10-njy aprel aralygynda Hytaýyň Jiangýin şäherinde uşu boýunça geçirilen dünýä Kubogynda Türkmen döwlet bedenterbiýe we sport institutynyň 4-nji ýyl talyby Göwher Gowşudowa uşunyň sanda görnüşi boýunça kümüş medala eýe boldy. Ýeri gelende bellesek, söweş sportunyň bu görnüşi boýunça dünýä Kubogyny almak ugrunda geçirilen halkara ýaryşda 26 ýurda wekilçilik edýän 116 türgen özara ýaryşdy.
