Kia-nyň Hindistanda ýerleşýän zawodynda uly göwrümli ogurlyk ýüze çykaryldy. Soňky bäş ýylyň dowamynda, zawodyň çäginden, takmynan, 900 sany hereketlendiriji ýitirim bolupdyr diýip, «Economic Times» neşiri habar berýär.
Polisiýanyň pikirine görä, bu ogrulyklara öňki we häzirki işgärleriň gatnaşan bolmagy mümkin. Derňew maglumatlaryna görä, olar öňünden ylalaşyp, resminamalary we gollary galplaşdyran bolmaly. Ilkibaşda hereketlendirijiler Tamilnad ştatyndan daşalanda ýitýändir öýdülipdi. Emma barlaglar, ýitirim bolmalaryň zawodyň içinde bolup geçendigini görkezdi.
Derňewi alyp barmak üçin üç sany ýörite topar döredildi. Polisiýanyň berýän maglumatlaryna görä, derňew işjeň dowam edýär, ýöne häzire çenli ogurlanan hereketlendirijileriň nirä äkidilendigi belli däl.
2019-njy ýylda açylan Kia zawody ýylda 300 müňden 400 müň aralygynda awtoulag öndürýär. Kompaniýanyň wekilleri bu ogrulyklaryň önümçilige täsir etmändigini belleýärler.
Hukuk goraýjy edaralar bolsa, şeýle uly göwrümli ogrulygyň nädip bäş ýyl töweregi ünsden düşüp galandygyny anyklamaga çalyşýarlar.
