Hindistanyň Tata kompaniýasy dünýäniň iň elýeterli modelleriniň biri hasaplanýan Tiago hetçbeginiň täzelenen görnüşini tanyşdyrdy. Awtomobiliň doly göwrümli resmi premýerasy 28-nji maýda meýilleşdirilýär.
Tiago modeliniň häzirki wagtda satuwdaky wersiýasynyň bahasy, takmynan, 4800 dollardan başlanýar. Kompaniýa bu täze ulagy geljekki nesliň modeli diýip atlandyrsa-da, hakykat ýüzünde gürrüň diňe bir restaýling barada gidýär.
Hödürlenen suratlardan görnüşi ýaly, üýtgeşmeler, esasan, awtomobiliň daşky keşbine degişlidir. Hetçbek has inçe faralary, ykjam radiator gözenegini, öwrüm görkezijileri goşulan täze gapdal aýnalaryny, birleşdirilen yzky faralary we 15 dýuýmlyk tigir disklerini aldy. Daşyndan seredeniňde, täze model ýewropa awtomobillerini, aýratyn-da, Opel Corsa modelini ýatladýar.
Ulagyň salonynyň suratlary entek resmi taýdan neşir edilmedi. «Carscoops» neşiriniň berýän maglumatyna görä, täzelenen Tiago öz taryhynda ilkinji gezek ozal Tata Punch krossowerinde ulanylan töwerekleýin syn ediş kamerasyna eýe bolar. Şeýle hem awtomobilde sanly enjam paneline we ekranynyň ölçegi 10,25 dýuým bolan multimedia ulgamyna garaşylýar.
Ulagyň iň ýönekeý üpjünçiliginde öňki iki sany howpsuzlyk ýassygynyň deregine indi altysy bolar.
Öndüriji tarapyndan ulagyň tehniki häsiýetnamalary entek doly aýan edilmedi. Ýöne hereketlendirijileriň öňküligine galjakdygy çaklanylýar. Häzirki wagtda bu model 85 at güýjüne barabar bolan 1,2 litrlik benzin hereketlendirijisi, 75 at güýjündäki iki dürli ýangyçly wersiýasy, şeýle-hem doly elektrikleşdirilen görnüşi bilen hödürlenilýär.
