Microsoft korporasiýasy esaslandyrylmagynyň 50 ýyllygy mynasybetli, ýadygärlik hökmünde Surface noutbugynyň çäklendirilen ýörite görnüşini taýýarlady. Bu enjam diňe Instagram-da geçirilýän konkursa gatnaşan 50 adama sowgat berler diýip, «PCWorld» habar berýär.
Eksklýuziw model adaty Surface noutbuklardan tapawutlanýar: adatça, noutbugyň gapagyndaky Windows nyşany korpusyň reňkine laýyklykda ýasalýar – meselem, enjam gara reňkde bolsa, nyşanam gara bolýar. Ýubileý üçin taýýarlanan görnüşde bolsa, nyşan altyn reňk bilen bezelen we düýpgöter tapawutly görünýär. Noutbugyň içki böleginde hem aýratyn bir detal bar – ol hem Microsoft-yň 1975-nji ýyldaky nyşanydyr.
Microsoft 50 sany «Surface Laptop 50th Anniversary» enjamyny Instagram-da konkurs arkaly paýlaýar. Konkursa diňe ABŞ-nyň we Puerto-Rikonyň ýaşaýjylary gatnaşyp bilerler. Ol 16-njy aprele çenli dowam eder. Konkursa gatnaşmak isleýänler «Ýolda Surface» (Surface on-the-go) mowzugynda bir suratyny öz sahypalarynda paýlaşmaly. Gatnaşýan adamda Surface enjamy bolmaly ýa-da ony birinden wagtlaýyn almaly bolar. Şeýle-de Surface sahypasyny yzarlamaly we paýlaşylan surata ýörite heştegleri goşmaly.
Enjamyň tehniki häsiýetleri barada maglumat berilmeýär.
