Microsoft korporasiýasy Word, Excel we PowerPoint programmalarynyň nyşanlaryny täzelemegi göz öňünde tutýar. Kompaniýa ulanyjylara soragnama ugradyp, täze nyşanlar baradaky pikirlerini toplady diýip, «The Verge» neşiri habar berýär.
«Biz Microsoft-da önümlerimizi hemişe kämilleşdirmäge hem-de size hakykatdanam ýarajak ulanyjy tejribesini döretmäge çalyşýarys» — diýip, kompaniýanyň hatynda bellenilýär. Soragnama, takmynan, 15 minut wagt alýar we nyşanlaryň täze taslamalaryny bahalandyrmaga mümkinçilik berýär.
Täze nyşanlar häzirki görnüşlerinden has täsirli dizaýny bilen tapawutlanýar. Soňky ýyllarda giňden ulanylan tekiz stiliň ýerine, bu gezek çuňluk duýgusyny döredýän köp gatly elementler ulanylypdyr. Bu usul her nyşany has özboluşly edýär. Häzirki nyşanlaryň biri-birine meňzeşligi sebäpli, ozal käbir tankytlara sezewar bolandygyny göz öňünde tutsak, bu möhüm özgertme bolup durýar.
Microsoft nyşanlaryny soňky gezek 2018-nji ýylda täzeläpdi. Şonda döwrebap minimalizm elementleri girizilipdi. Täze nyşanlaryň esasynda Microsoft-yň beýleki programmalarynda, şol sanda Windows 11-de ulanylýan 3D emodžilerde we gara reňkli tertibi goldaýan täzelenen giriş interfeýsinde peýdalanylýan Fluent 2 dizaýn dili durýar diýlip çaklanylýar.
Täze nyşanlaryň resmi taýdan ulanyşa haçan giriziljekdigi mälim edilmedi.
