Daniýanyň Zenvo Automotive kompaniýasy «Aurora» giperkary üçin niýetlenen «Mjølner» atly 6,6 litrlik V12 hereketlendirijisini tanyşdyrdy. Bu barada «Interesting Engineering» neşiri habar berýär.
«Mjølner» dört sany turbokompressor bilen enjamlaşdyrylan we 1250 at güýjüni öndürýär. Oňa her biri 200 at güýjüni öndürýän bir ýa-da üç sany elektromotory goşmak hem mümkin. Bu bolsa onuň umumy kuwwatyny 1850 at güýjüne ýetirýär.
Zenvo Automotive kompaniýasy «Mjølner-iň» ýol ulaglary üçin niýetlenen iň güýçli V12 hereketlendiriji bolup durýandygyny belleýär. Şeýle güýçli netije innowasion tehnologiýalaryň we kuwwatly turbokompressorlaryň utgaşdyrylmagy bilen gazanyldy.
Bu hereketlendiriji üçin işlenip düzülýän «Aurora» giperkary kompaniýanyň esasy taslamasy bolar we awtoulag pudagyndaky täze mümkinçilikleriň öňüni açar. Zenvo Automotive işläp düzen hereketlendirijisiniň ýol awtoulaglarynda nämeleriň mümkin bolup biljekdigi baradaky düşünjeleri üýtgetjekdigine ynanýar.
