Microsoft korporasiýasy OpenAI-a 13,75 milliard dollar maýa goýan hem bolsa, öz emeli aň modellerini işläp düzýär. Bu barada Microsoft AI-yň ýolbaşçysy Mustafa Süleýman aýtdy.
Onuň sözlerine görä, uzak möhletleýin perspektiwada kompaniýanyň bu ugurda garaşsyz bolmagy möhüm, emma her näme-de bolsa OpenAI bilen ýakyn hyzmatdaşlyk, azyndan, 2030-njy ýyla çenli dowam eder.
Süleýman Microsoft-yň maksadynyň öňdebaryjy EA modellerini döretmek däldigini aýratyn belledi.
«EA boýunça örän güýçli toparymyz bar, hasaplaýyş mümkinçiliklerimiz hem örän uly. Emma dünýädäki iň güýçli modeli döretmek üçin tagalla etmek we munuň üçin [ägirt uly] serişdeleri sarp etmek hökman däl. Bu diýseň gymmat we şol tagallalary gaýtalamagyň geregi ýok» — diýip, ol aýtdy.
Onuň pikirine görä, modeli üç gün ýa-da birnäçe aý yza galyp çykarmak bilen hem serişdeleri tygşytlap, bäsdeşlige ukyply galyp bolýar.
«Aslynda bu biziň strategiýamyz – şeýle uly çykdajy talap edýän modeller bilen işleşmegiň şertlerini göz öňünde tutup, ikinji orunlarda güýçli ýagdaýda oýnamak» — diýip, Süleýman aýtdy.
Microsoft bilen OpenAI-yň arasyndaky ýakyn hyzmatdaşlyk, bahasy 500 milliard dollar bolan Stargate taslamasynyň işe girizilmegi bilen sowap başlady. Sebäbi şol taslamada OpenAI-yň esasy hyzmatdaşy Oracle-dy. Şeýle-de Microsoft OpenAI-yň iň uly maýadary derejesini hem ýitirdi. OpenAI-yň soňky maliýeleşdiriş tapgyry SoftBank-yň ýolbaşçylygynda geçirildi we şol tapgyrda ChatGPT-niň işläp düzüjileri 40 milliard dollarlyk maýa çekdi.
