Nýurburgring ýolunda BMW Skytop kupesiniň ýol synaglary tamamlandy. Model markanyň taryhynda iň seýrek modelleriň biri boldy, tiraž bary-ýogy 50 nusga bilen çäklendirildi. Awtomobilleriň ählisi eýýäm satyn alyndy diýip, ITHome habar berýär.
Ulag 625 at güýjüni berýän goşa turbinaly 4,4 litrlik V8 hereketlendirijisi bilen üpjün edildi. Öndürijiniň nygtamagyna görä, bu “iň kuwwatly V8 hereketlendirijisi”. Awtoulag 3,3 sekuntda tizligini sagatda 100 km çenli artdyrýar. Hereketlendiriji 8 basgançakly awtomatik hereket gutusy bilen bilelikde işleýär.
Skytop-yň dizaýny BMW 507 Roadster we Z8 modellerinden ylham aldy. Kupe ýiti çyzyklara, inçe faralara, ýagtylyk saçýan radiator gözenegine we inçe Blade yzky çyralaryna eýe boldy.
Salon kaşaňlyk elementleri bilen retro-stilde ýerine ýetirildi: gyzyl-goňur deri ulanylýar, iDrive ulgamy bolsa nusgawy görnüşi saklaýar.
Önümçilik Dingolfingdäki zawodda el bilen amala aşyrylýar, bu ýerde BMW 3.0 CSL hem ýygnalýar. Modele konseptden başlap, çykýança 15 aý gerek boldy.
Skytop-yň bahasy, takmynan, 500 000 dollar. Ulag eýelerine 2025-nji ýylyň ahyryna çenli gowşurylar.
