Tesla kompaniýasy öz muşdaklaryna we kosmos höwesjeňlerine geň galdyryjy täzeligi taýýarlaýar: ABŞ-nyň Nýu-Meksiko ştatynyň Rozuell şäherinde UFO-dan (näbelli uçýan obýektden) ylham alnyp taýýarlanan dizaýny bilen täze Supercharger zarýad stansiýasy peýda bolar. Bu barada «Teslarati» habar berýär.
Rozuell şäheri 1947-nji ýylda Korona şäherçesiniň golaýynda, näbelli jisim ýere gaçansoň meşhur bolýar. Hökümet onuň «meteozonddygyny» aýtsa-da, «uçýan tarelka» barada dörän myş-myşlar Rozuell şäherini ufologik turizmiň merkezine öwürýär.
Tesla bu taryhy wakadan döredijilikli peýdalanyp, futuristik görnüşde stansiýa döretmegi makul bildi. Täze nawesiň aşagynda sekiz sany zarýad posty ýerleşer.
MarcoRP atly insaýderiň bellemegine görä, bu taslama diňe bir üýtgeşik dizaýny bilen däl, eýsem peýdaly aýratynlyklary bilen hem tapawutlanýar: nawes 20,88 kWt kuwwatly gün panelleri we RGB yşyklandyryş ulgamy bilen enjamlaşdyrylar. Tesla-nyň Demirgazyk Amerikadaky zarýad infrastrukturasy bölüminiň ýolbaşçysy Maks de Zeger kompaniýanyň käbir Supercharger zarýad stansiýalaryny şeýle bir ajaýyp etmek isleýändigini aýtdy welin, olaryň özleri ýörite gezelenç bilen gelip görmäge mynasyp bolar.
