Indoneziýanyň Haraku Ramen kompaniýasy oýunçylar üçin ýörite taýýarlanan 3,5 metrlik unaşy satuwa çykardy. Täze önüm oýun oýnaýan wagtlary ünsüni sowmazdan naharlanmak isleýän oýunçylara gönükdirilýär diýip, «BrandingInAsia» çeşmesi habar berýär.
Unaş dykyz hamyrdan taýýarlanansoň, sorulyp iýlende ýyrtylmaýar. Kompaniýa bu aýratynlygyň önümiň esasy artykmaçlyklarynyň biri bolup durýandygyny aýdýar. Görnüşi adatdan daşary bolsa-da, bular ýene-de taýýar nahardyr. Unaşyň her tarynyň uzynlygyna we dokumasyna uly üns berlip taýýarlanylýar.
Ilkinji çäkli mukdardaky önümler 2025-nji ýylyň mart aýynyň ahyrynda satuwa çykaryldy. Bu önüm gaty uly islege eýe bolup, birnäçe günüň dowamynda doly satylyp gutardy. Kompaniýa bu önümden goşmaça ýene öndüriljekdigini wada berdi.
Önümiň şeýle meşhur bolmagyna onuň üýtgeşik gaplamasy hem täsir etdi: her porsiýa wideooýunlaryň äheňinde bezelen görnüşde, gönüburç gutuda hödürlenýär.
Bu unaş sosial torlarda, şol sanda strimerleriň we oýunçy blogerleriň üsti bilen giňden mahabatlandyrylýar.
Täzelige diňe Aziýada däl, eýsem ABŞ-daky we Ýewropadaky oýunçy jemgyýetlerinde hem uly gyzyklanma bildirildi – bu pikire eksport üçin mümkinçilik hökmünde hem garap başladylar. Indoneziýanyň özünde bolsa, bu görnüşiň ýaşlaryň arasynda täze gastronomik trende öwrülip biljekdigi ara alnyp maslahatlaşylýar.
