ABŞ-nyň Kaliforniýa uniwersitetiniň Berkli şäherindäki inženerleri dünýäniň iň kiçi uçýan robotyny işläp düzdüler. Alymlar bu enjamy döretmek üçin mör-möjeklerden ylham aldy. Bu barada uniwersitetiň resmi web sahypasynda bellenilip geçilýär.
Kiçijik robotyň diametri bary-ýogy 9,2 mm, agramy bolsa – 21 mg. Enjam kiçijik propeller görnüşinde bolup, iki sany ownuk magnitden ybarat. Daşky magnit meýdanynyň täsiri bilen bu magnitler biri-birine çekilýär we yza iteklenýär. Hut şu mehanizm kiçijik robotyň howa göterilmegini üpjün edýär.
Ol howada asylyp durmaga, ugruny üýtgetmäge we kiçi nyşanalary urmaga ukyply. Enjamy simsiz dolandyrmak mümkin. Şonuň üçin ony belli bir obýekte tarap golaýlaşdyryp hem bolýar. Inženerleriň bellemegine görä, robot daşyndan seredeniňde ary ýa-da çybyn ýaly görünýär.
Geljekde bu enjam ösümlikleri tozanlandyrmak we barmasy kyn ýerlere gözegçilik etmek üçin, şeýle-de gözleg-halas ediş operasiýalarynda ulanylyp bilner. Inženerler enjama has kämil dolandyryş ulgamyny goşmagy meýilleşdirýärler.
