Hytaýyň DeepSeek atly startapynyň çat-boty iň çalt ösýän emeli aň guraly boldy. «Aitools.xyz» analitika platformasynyň maglumatlaryna görä, bu startapyň çat-boty fewral aýynda 524,7 million gezek zyýarat edilip, ChatGPT-niň 500 millionlyk zyýaratyndan öňe geçdi. Bu barada «Economic Times» neşiri habar berýär.
DeepSeek näçe çalt össe-de, ol häzirlikçe ChatGPT-den we Canva-dan soň dünýäde iň köp ulanylýan üçünji emeli aň guraly bolup durýar. Şol bir wagtda-da onuň bazardaky paýy 2,34%-den 6,58%-e çenli ýokarlandy, bu bolsa onuň meşhurlygynyň çalt artýandygyny görkezýär. Fewral aýynda DeepSeek çat-botuna jemi 792,6 million gezek girildi, ony ulanýan ulanyjylaryň sany bolsa 136,5 milliona ýetdi.
Hasabatda bellenilmegine görä, 43,36 million gezek zyýarat edilme bilen Hindistan DeepSeek-iň iň uly trafik çeşmeleriniň dördünjisi boldy.
Umuman, fewral aýynda emeli aň gurallaryna jemi 12,05 milliard gezek girildi, dürli emeli aň gurallary bilen täsirleşen ulanyjylaryň sany bolsa 3,06 milliard boldy.
«Aitools.xyz» platformasynyň maglumatlaryna görä, ol häzirki wagtda 171 kategoriýa boýunça 10 müň 500-den gowrak emeli aň gurallaryny yzarlaýar. Fewral aýynda DeepSeek çat-bot bazarynda 12,12% paý eýeledi we bu ugurda diňe ChatGPT-den yzda galdy.
