Amazon ahyrky pursatda Hytaýyň ByteDance kompaniýasyna degişli TikTok-yň ABŞ-daky bölümini satyn almak üçin arza berdi. Bu barada çeşmelerine salgylanyp, «The New York Times» neşiri habar berýär.
Amazon öz teklibini ABŞ-nyň wise-prezidenti Jeý Di Wense we söwda ministri Goward Lýutnige iberen hatynda mälim etdi.
Şeýle-de bolsa, TikTok-yň eýeçilik gurluşyny üýtgetmek boýunça geçirilýän gepleşiklere gatnaşýan taraplaryň Amazon-yň teklibine çynlakaý garamaýandygy mälim edilýär. Amazon bolsa bu mesele barada düşündiriş bermek islemeýär.
Mümkin bolan alyjylaryň arasynda dürli wagtlarda Microsoft, Ilon Mask, meşhur bloger MrBeast hem-de hususy maýa goýum kompaniýasy Blackstone ýaly atlar agzaldy.
Ak tam TikTok resmi taýdan satylmazdan, diňe amerikaly maýadarlaryň kompaniýanyň paýdarlarynyň arasyna goşulmagy bilen hem bu meseläniň çözülip bilinjekdigini göz öňünde tutýar diýip, «The New York Times» neşiri belläp geçýär.
Ýatlatsak, 2024-nji ýylyň ýazynda ABŞ-nyň Wekiller palatasy TikTok Hytaýyň ByteDance kompaniýasynyň eýeçiliginde galan halatynda, ony ýurtda gadagan etmäge mümkinçilik berýän kanuny kabul edipdi. Kongress sosial toruň ABŞ-nyň milli howpsuzlygyna howp salýandygyny öňe sürüp, Hytaýyň hökümetiniň ulanyjylaryň şahsy maglumatlaryna elýeterliliginiň bardygyny aýdypdy. Aprel aýynda prezident Jo Baýden degişli kanuna gol çekipdi, şu ýylyň ýanwar aýynda bolsa, ABŞ-nyň Ýokary kazyýet ony güýjünde galdyrypdy.
20-nji ýanwarda wezipesine girişen Donald Tramp ABŞ-nyň baş prokuroryna bu kanunyň güýje girizilmegini 75 gün (5-nji aprele çenli) yza süýşürmegini tabşyrýan permana gol çekdi. Ol TikTok-yň ABŞ-da işlemegini dowam etdirmegi üçin, kompaniýanyň paýlarynyň 50%-niň ABŞ-nyň kompaniýalaryna geçirilmelidigini mälim edipdi.
