ABŞ-da Muse S Athena atly akylly sargynyň satuwy başlandy. Bu enjam emeli aň arkaly ukyny, ünsi jemlemegi, aň-paýhas (kognitiw) başarnyklaryny we umumy saglygy gowulandyrmaga kömek edýär. Bu barada «Business Wire» habar berýär.
Enjam elektroensefalograf (EEG), infragyzyl spektroskopiýa (fNIRS), fotopletizmograf (PPG), akselerometr we giroskop bilen üpjün edilen. Bu sensorlar beýniniň işjeňligini, ganyň akymyny, gandaky kislorodyň derejesini, ýüregiň urşuny, dem alşy, bedeniň ýagdaýyny we ukynyň tapgyrlaryny yzarlap bilýär.
Maglumatlaryň seljerilişi Foundational Brain Model (FBM) atly emeli aň modeliniň esasynda ýerine ýetirilýär. Bu model 80 müň EEG seansynyň maglumatlary esasynda türgenleşdirilen. Enjam ulanyjylara häzirki wagt pikirleniş yzarlamasyny (feedback) hödürläp, stresiň derejesini peseltmäge we aň-paýhas başarnyklaryny gowulandyrmaga ýardam berýär.
Has düýpli ulanyş üçin meditasiýa we uky gözegçiligi ýaly aýratynlyklary bolan programma hödürlenýär. Bu programma apnoe ýaly uky bilen baglanyşykly kynçylyklary ýüze çykarmaga hem kömek edýär.
Muse S Athena ABŞ-da 474,99 dollardan satuwa çykaryldy. Programmadaky esasy funksiýalar mugt, ýöne giňişleýin derňew we meditasiýa hyzmatlary bolan premium abunalygyň aýdaky tölegi 12,99 dollar.
