Ýaňy-ýakynda Hytaýyň Milli kosmos müdirliginiň ýanyndaky Uzak kosmos barlaglary laboratoriýasy (CNSA) tarapyndan hödürlenýän slaýd Internetde peýda boldy. Onda Ýerden daşarda ýaşaýyş gözlemek bilen baglanyşykly boljak geljekki missiýalar görkezilýär diýip, SpaceNews habar berýär.
Hytaý öz taslamalarynyň jikme-jikliklerini öňünden örän seýrek ýagdaýda açýar, şonuň üçin, hatda bu bölejik maglumat hem uly gyzyklanma döretdi.
“Týanwen-3” ilkinji missiýa bolar we onuň çäklerinde 2028-nji ýylda Marsa apparat ugradylar. Apparat topragyň nusgalaryny ýygnap, olary derňew üçin Ýere getirer.
2029-njy ýylda Ýupitere “Týanwen-4”-i uçurmak meýilleşdirilýär. Zond suwuk suw ummanynyň bolup biljek ýerine - onuň hemrasy Kallistonyň orbitasyna çykar. 2030-njy ýyla çenli Ýerdäki laboratoriýa şertlerinde şol ýeriniň daşky gurşawynyň hakyky nusgasy döredilmelidir. 2033-nji ýylda atmosferanyň ýokarky gatlaklaryndan nusgalary ýygnamagyň we getirmegiň missiýasyny guramak meýilleşdirilýär. 2038-nji ýylda Hytaý Marsda barlag merkezini döretmek isleýär we 2039-njy ýylda bolsa Neptuna we onuň hemrasy Tritona ýadro energiýasy bilen işleýän apparaty ibermek isleýär.
Bu meýilnamalary amala aşymagyň näderejede mümkindigini entek aýtmak kyn. “Týanwen-3” doly amala aşyryp boljak taslama hasaplanýar, şol bir wagtyň özünde “Tianwen-4” missiýasynyň jikme-jiklikleri üýtgedi, bu taslamanyň ara alnyp maslahatlaşylýandygyny ýa-da taslamalaşdyryş tapgyryndadygyny aňladyp biler.
Neptuna boljak missiýa iň şübhelisi, sebäbi ýadro hereketlendirijisi tehnologiýasy, hatda ABŞ üçin hem häzirlikçe elýeterli däl bolmagynda galýar.
