Minnesota ştatynyň Maund şäherinde meýn-kun tohumyna degişli özboluşly çal pişik ýaşaýar. Onuň ady Pagsli Addams bolup, bir aýratynlygy – kähalatlar oýnamaga-da päsgel berýän üýtgeşik uzyn guýrugy bar.
Ol eýýäm iki ýyl bäri Kemeronlar maşgalasy bilen ýaşaýar. Onuň hojaýynlary Addams maşgalasy baradaky multfilmiň muşdagy bolandygy üçin, pişige personažlaryň biriniň adyny dakypdyr.
“Haçan-da men ony ilkinji gezek weterinara äkidenimde, ol ofise girip, şeýle diýdi: “Bu örän uzyn guýruk!” Men şonda öz pişigime başgaça seretdim we bu, hakykatdanam, şeýlemi diýip pikir etdim” – diýip, Amanda Kemeron ýatlaýar.
Soňra maşgala Pagsliniň guýrugynyň uzynlygy barada ençeme gezek gürleşdi. Bir gün olar Ginnesiň rekordlar kitabyny barlamak kararyna geldi. Netijede, olaryň pişiginiň guýrugynyň öňki görkezijiden geçýändigi anyklandy.
Weterinarlar pişigiň guýrugyny ähli düzgünlere görä ölçedi. Onuň uzynlygy 18,5 dýuým ýa-da 46,99 santimetr boldy. Bu hem Pagslini häzirki wagtda ýaşaýan pişikleriň arasynda iň uzyn guýrugyň eýesine öwürdi.
Meýn-kunlar – bu öý pişikleriniň iň uly tohumy. Olaryň gür tüýi bolýar we olar 4-5 ýylda özüniň doly ululygyna ýetýär. Pagsli heniz ýaş, şol sebäpli onuň guýrugy ýene uzyn bolup biler.
