NASA-nyň Parker Solar Probe zondy Günüň atmosferasyna nobatdaky girişini üstünlikli tamamlady we Gün işjeňligi barada möhüm maglumatlary ýygnady. Enjam Günüň üstünden 6,1 mln km aralykda 692 müň km/sag tizlik bilen uçup, adam tarapyndan döredilen iň tiz obýekt boldy diýip, Scitechdaily habar berýär.
Bu uçuş Parker-iň Güne 23-nji ýakyn uçuşy boldy. Ol 2024-nji ýylyň dekabr aýynda eýýäm şeýle tizlik we aralyk görkezijisine ýetipdi.
23-nji uçuşyň dowamynda zonduň dört ylmy guralynyň ählisi doly güýjüne işledi. Parker magnit meýdanlary, Gün alawlamalary we bölejikleriň akymy barada maglumatlary ýygnady. Bu döwürde enjam awtonom režimde hereket etdi, çünki Ýerden signal oňa birnäçe minutda ýetýär. Jons Hopkinsiň Amaly fizika barlaghanasynyň alymlary zonduň kadaly işleýändigini eýýäm tassyklady.
Parker missiýasynyň esasy maksady güýçli Gün ýelleriniň döreýän ýeri bolan Gün täjini öwrenmekden ybarat. Zarýadly bölejikleriň bu akymlary hemralara, nawigasion ulgamlara we elektrik torlaryna täsir edip bilýär. Enjamyň ýylylyk galkany aşa temperatura çydamaga mümkinçilik berýär.
Missiýa ýedi ýyl dowam eder. Geljekde Parker Güne ýene has ýakyn uçar hem-de alymlara Gün tupanlaryny we olaryň Ýere täsirini has takyk çaklamaga kömek eder.
