«DataForce-yň» maglumatlaryna görä, 2025-nji ýylyň fewral aýynda Ýewropada Hytaýda öndürilen awtoulaglaryň satuwy geçen ýyl bilen deňeşdirilende 64% artdy. Jemi 38 müň 902 sany awtoulag satyldy. Hytaý brendleriniň Ýewropanyň awtoulag bazaryndaky paýy 2,5%-den 4,1%-e çenli ýokarlandy diýip, «Automotive News» neşiri habar berýär.
Bu ösüş esasan benzinli we gibrid modelleriň hasabyna boldy, sebäbi olar Ýewropanyň elektrokarlar üçin girizen gümrük paçlaryna sezewar bolmady. Hytaýyň elektrikli awtoulaglarynyň satuwy 3,4% peseldi, emma umuman Ýewropanyň elektrokar bazary 26% ösdi.
Hususan-da, Hytaýyň PHEV (tokdan zarýad alýan gibrid) awtoulaglaryna uly isleg bildirildi. Olaryň satuwy 321% ýokarlandy we jemi 4 müň 744 sany awtoulag satyldy. «BYD Seal U» we «Omoda» benzinli we gibrid görnüşleri bilen satuwda öňdeligi eýeledi. Şol bir wagtda Zeekr, Lynk & Co, Xpeng we Nio brendleriniň satuwy pese düşdi.
